1Cor 13 | BEF | STEP | Nani niginaga mefise nohuto bona'magihi enonogo'anigutifi to agelo bona'magihi enonogogutifi mono ka lutita nani fa'mene minotine. Ya'ma fa'mene pepe notina nasana belo nogo ya suhi huto fa'menena lolo hutine.

1 Corinthians 13

Lemehi epito enehe'molata ka

1 Nani niginaga mefise nohuto bona'magihi enonogo'anigutifi to agelo bona'magihi enonogogutifi mono ka lutita nani fa'mene minotine. Ya'ma fa'mene pepe notina nasana belo nogo ya suhi huto fa'menena lolo hutine. 2 To nani Hu'mamofihi ka lu huto huto hulata bo lolo huto huto'ni Hu'mamofihi suguna ka'a yamofihi keheli su ho'ohuto'ni to Hu'mamofihi kamofihi nekisa mokisa'a hiti keheli su hoto nohuto'ni to nani linogo kosa mone li sibi hu he'milibe luto keheli ule'ale hu'ohuto'ni niginaga mefise fa'mene minotita fa'menena lolo hutine. 3 To ana'ina asaga enumuhi meni'ina bona'i enehe'malube luto fe'noha'ni he'mi su holoto to enali kumu luto nugufa logogu he'miloto'ni niginaga mefise fa'mene minotita fa'menenamo ni'inago ya nasanauba nele'mo bati mehitita'mu yabe.

4 Eniginaga fise nehilana bona'magi enipakafa mehese agoya hite minalune'mu habe. Enali siko mehise enali'ani'mu kehelinogo metinogo enali'ani enigi'ani lelite metilana'mu li saga mehilune'mu habe. 5 Eniginaga fise nehilana bona'magi enali bebe mesose hapa'ani melise, yogo fe'nohi li pili mekose, hipa mehi epelese, bona'magihi foipana lu gehe meli epelese, 6 foipa nasanauba i futili nehinogo enegelo mebise, lamana'amofihi nasanauba i futili nehinogo enipagu bati huse'na kehelilune'mu habe. 7 Eniginaga fise nehana bona'magi enali keta'a hiti nasana fa'mene kosele'ani meenehenogo kofilana'mu yabe. Ana'ina'mu asaga'i kehelite amuya melete minalana'mu yabe. Komopa'aniguti Hu'mamofihi agoya hu emite enifita ite minete Hu'mamofihi kagu amuya melete minomo buto minalana'mu yabe.

8 Eniginaga fise nasana ya'ma su mehose minoba minoba hilina'mu yabe. Hu'mamofihi baga'aguti lu huto hulata ka yamofihi su halina'mu yabe. To fato enonogoguti lulata nasana ya'ma su halube'mu hibe. To kaga fato fato'mofihi hapa'a kehelilatana hiti ya'ma su hoto fenene hilina'mu yabe. 9 Ka hapa'a kehelilatana hiti lu huto hulata ka lulata nohuta yamofihi ifo haya'alo ni'ibe. 10 Minoto aliha'a ya'ma minoba minoba nasana hapa'alo huto nohinogo ifo haya'alo ni'ina nasana su hoto fenene hilina'mu yabe.

11 Nani yagapana'i inapuhi lolo huto minoto inapu ka luto mino'ohuna, to inapupagi kehelilata nehana enegekesa kehelito mino'ohunamo yata'isi ya'ma olopa bo lolo huloto'ni, yagapana'i inapupagihi nasana ahe'mi'ohube. 12 Ana suhi huto yatai kana'a kehelilata nohuna ya'ma gapo gapo'uba lokaba labaga li gelehe higo bu goto bu go fe luse mehu'ohuta ya suhi huto ni'ibe. Aliha'a ai bulo bu genogo ai bulo bu genogo huto bu galune. Yatai kana'a kehelise'na hiti mone kegi'a anasi keheli'ohune. Alihi kana'a keheli su halune. Aliha'a yamofihi legeya'a lamana'a lubulo huto hinogo Hu'mau lali hapati keheli su ho'ehina ya suhi huto lali bu goto keheli fe luto kehelilune'mu hune.

13 To minoba minoba hilana nasana ya'ma yabe. Hu'mamofitoga keheli amuya nomolota to huto hilina'a sa sa huto geba nohuta to liginaga fise nohuta yamofihi nasana loebe monebe nehanaya liginaga fise nohuta yamofihi le'mo kohe to'ehibe.